Oooohh lala...Sinigang na Baboy!! :))

        Kilala tayong mga Pilipino na likas na mahilig sa mga pagkain; kaya naman nakakalikha tayo ng iba't ibang klase nang pagkain pumapatok sa maraming Pinoy at pati na rin sa mga dayuhan. Ang pagkahilig natin sa mga pagkaing masasarap ay nagpapatunay na ang istilo o paraan ng pagluluto ng putahe ay hindi basta basta at mas napapalago at napapatatag pa natin ang trdisyonal na kultura nating mga Pilipino.

          Ang putaheng Sinigang na Baboy ay kilalang lutong bahay na pagakain ng mga Pinoy. Ang mga masasabaw na pagkain gaya ng Sinigang na Baboy ay sadyang kinahihiligan natin. Bilang isang Pinoy na tunay na mahilig sa masasabaw na pagkain, napili ko itong Sinigang na Baboy na aking paboritong pagkain. Ang amoy sustansya,linamnam,init ng sabaw at maasim na lasa ang nakapagpahikayat sa akin na magustuhan ito.

          Bata pa lang ako noong una ko itong matikman at naging paborito ko na itong pagkain. Sa pagkain na ito una akong natutong kumain nang mga gulay. Ang Sinagang na Baboy ay isang masustansyang pagkain dahil sa mga sangkap na gulay. Anu- ano nga ba ang mga sangkap nito? Unahin natin ang mga gulay; kangkong, kamatis, okra, gabi, sitaw, siling panigang, puso ng saging, at labanos ay ilan sa mga gulay na nagpapasustansya sa pagkain. Ang karne namang baboy ay nagpapadagdag ng sarap. Ang pinagang katas ng sampalok ang mas nagpapasarap at nagpapaasim sa sabaw. Nilalagyan din ito ng asin para sa lasa at kung minsan ay mayroong "Sinigang Mix". Ang init at sarap ng sabaw ay mistulang pumapawi ng aking pagod at napapagaan nito ang aking mabigat na pakiramdam. Ang pagkain na ito ay talagang nakakapukaw sa panlasa ng mga tao dahil sa asim na dulot nito na mapapapikit ka sa sarap. Hindi gaanong mahirap hanapin ang ganitong klase ng pagkain dahil isa itong lutong bahay. Ngunit, maari rin itong matagpuan sa mga karinderya at mga sikat na Pinoy restwaran katulad ng Max's at Barrio Fiesta.

          Masasabi kong ang Sinigang na Baboy ay tunay na masarap sa aking panlasa at kailanman ay hindi ako magsasawang kainin ito. Matuturing ko itong pang- masang pagkain dahil sa sarap at mura nitong sangkap. Kaya naman tikman natin ang sarap at tunay na gawa nating mga Pilipino, ang Sinigang na Baboy!

Lorraine Angela M. Santiago

1H3