Puto Bumbong^^

Pasko na naman muli, Ang Puto Bumbong ay muling Maghahari!

Sadyang kay bilis nga naman ng panahon at ngayon ay malapit ng sumapit ang pinakainaabangan na okasyon sa Pilipinas, ang Pasko. Pagdating ng panahon na ito, isa sa mga tradisyon nating mga Pilipino ay ang pagsisimbang gabi na nagsisimula sa pagsapit ng ika-siyam na araw bago magPasko. Ngunit, ang tradisyon na iyan ay hindi magiging kumpleto kung wala ang aking paboritong pagkain, ang Puto Bumbong!

Ang Puto Bumbong ay ang isa sa mga pinakapopular na pagkain tuwing Pasko. Ito ang nakagawian na kinakain ng mga Pilipino pagkatapos ng Simbang Gabi dahil ito ay kadalasang ibinibenta sa labas ng mga simbahan. Ito ay gawa sa pinagsamang malagkit na bigas(Pirurutong) at ordinaryong bigas na hinaluan ng kulay ube na pangkulay ng pagkain na siyang nagbibigay dito ng kanyang kakaibang kulay. Ito ay pinapahiran ng mantikilya, binubudburan ng sariwang kinudkod na niyog at asukal, at ibinabalot sa dahon ng saging. Kapag kinain mo ito ay talagang mapapasabi ka ng “Salamat po, Panginoon!” dahil para itong pagkaing hulog ng langit sa sobrang sarap lalo na’t kung ito’y bagong luto.

Ito ang pagkain na talagang hinahanap-hanap ko tuwing Pasko dahil sa lambot, lagkit at tamis nito, isang kombinasyon na tunay na ‘match made in heaven’ na talagang hinding-hindi ko makakalimutan. Ito ay nagbibigay sakin ng ginhawa at talagang nagpapadama at nagpapakumpleto ng aking Pasko. Sino ba nga naman ang hindi maghahangad nito? Heto na rin sa wakas! Kasabay ng pagsilang ni Hesus na anak ng ating hari, nandito na rin ang pagkaing siyang naghahari tuwing pasko, ang Puto Bumbong!

- Dapogracion, Tricia Ann ^^